Членовите на Извршниот комитет на УЕФА треба да се состанат на вонредна седница следната недела за да одлучат за понатамошното учество на израелските национални селекции и тимови во натпреварувањата под покровителство на Европската куќа на фудбалот, при што мнозинството членови се наклонети кон суспензија, објавија неколку европски новински агенции, повикувајќи се на лондонскиот весник „Тајмс“.
„Мнозинството членови на Извршниот комитет ја поддржуваат суспензијата на Израел откако осум експерти на ОН, вклучувајќи го и известувачот за Палестина, Франческа Албанезе, во вторникот ги повикаа ФИФА и УЕФА да го суспендираат Израел „како одговор на геноцидот што продолжува на окупираната палестинска територија“, објави шпанската новинска агенција ЕФЕ.
Макаби во средата играше на гости против ПАОК и ремизираше 0-0 во рамки на воведното коло во Лига Европа. Гостувањето на израелскиот тим во Солун беше проследено со протести.
Израелскиот тим во второто коло, на 2 октомври, треба да му биде домаќин на загрепски Динамо, на неутрален терен во Србија, во Бачка Топола.