Репрезентативецот на Србија и фудбалер на Манчестер Јунајтед Немања Видиќ демантираше дека во текот на ова лето размислувал да си замине од таборот на "Црвените ѓаволи". Пред неколку дена неговиот менаџер Паоло Фабри изјави дека неговиот клиент посакува да замине во Барселона, по што следеше мобилна ситуација кај клубот од Олд Трафорд. Подоцна Фабри одрече дека рекол такво нешто, па Видиќ реши да даде конечен одговор до сите медиуми и наводно "заинтересираните" клубови.
"Никогаш не сум разговарал со Барселона, Реал Мадрид, Милан или некој друг клуб. Воопшто не сум ја спомнувал мојата иднина и не знам зошто некој друг би го сторил тоа за мене. Ќе кажам уште еднаш, не размислувам да го напуштам Манчестер бидејќи среќен сум овде, а и клубот е задоволен од мене. Тоа е најбитно за мене", изјави Видиќ.
Истовремено српскиот репрезентативец демантираше дека неговата сопруга Ана го наговорила да ја напушти студената Англија и да се преселат во потоплите краеви кај Барселона.
"Не знам од каде се тие информации. Ана не е класична сопруга на фудбалер. Таа никогаш нема дадено изјава во медиумите", додаде 27-годишниот дефанзивец.