Најдобриот фудбалер за 2009 и 2010 година, Лионел Меси доби уште една Златна топка овој пат за одиграното во 2011 година. Аргентинецот од Барселона стигна до хет-трик со што стана само вториот играч во историјата кој успеал да стигне до три круни по ред покрај Мишел Платини.
Кристијано Роналдо не беше во салата во Цирих бидејќи тој заедно со колегите од тимот и тренерот Мурињо мораше да остане во Мадрид. Сепак, сите беа свесни дека наградите овој пат ќе отидат во рацете на Барселона и нејзините членови бидејќи тие прикажаа најмногу во минатата година. Оттаму и немаше никакво изненадување кога беше соопштено името на Лионел Меси при прогласувањето за најдобриот фудбалер на 2011 година.
Како што е веќе вообичаено Меси не е од оние коишто премногу зборуваат така што тој имаше само кус коментар после добивањето на наградата.
"Ова е голем ден за мене и многу специјален трофеј за мене. Драго ми е што дојдов до оваа титула бидејќи конкуренцијата беше голема. Драго ми е и што уште еднаш заедно со мене во трката до последен момент беше и Чави со кого е навистина прекрасно да се игра. Тој е неверојатен играч. Воедно морам да им се заблагодарам на сите мои соиграчи кои ми беа од голема помош. Без нив немаше шанси за да стигнам до оваа награда. Тие се исто така заслужни за мојот успех. Заедно дојдовме до овој резултат", коментираше Лионел Меси.
За разлика од лани кога Меси беше пред Иниеста и Чави овој пат тоа беше пред Чави и Роналдо. Сепак, прогласувањето на Меси не беше никакво изненадување бидејќи сите добро знаеја и пред церемонијата каде ќе заврши наградата.
НАГРАДЕНИ
НАЈДОБАР ФУДБАЛЕР
ЛИОНЕЛ МЕСИ (БАРСЕЛОНА, АРГЕНТИНА)
НАЈДОБРА ФУДБАЛЕРКА
ХОМАРЕ САВА (ЈАПОНИЈА)
НАЈДОБАР ТРЕНЕР (МАШКА ЕКИПА)
ПЕП ГВАРДИОЛА (БАРСЕЛОНА, ШПАНИЈА)
НАЈДОБАР ТРЕНЕР (ЖЕНСКА ЕКИПА)
НОРИО САСАКИ (СЕЛЕКТОР НА ЈАПОНИЈА)
НАГРАДА ФЕРЕНЦ ПУШКАШ (НАЈУБАВ ГОЛ)
НЕЈМАР (САНТОС, БРАЗИЛ)
ПРЕТСЕДАТЕЛСКА НАГРАДА
АЛЕКС ФЕРГУСОН (МАНЧЕСТЕР Ј., ШКОТСКА)
ФЕР-ПЛЕЈ
ФУДБАЛСКА ФЕДЕРАЦИЈА НА ЈАПОНИЈА