Своето разочарување по синоќешниот пораз од Луксембург, покрај селекторот Џон Тошак, не го криеше и капитенот Горан Пандев.
- Селекторот Тошак направи се во овие неколку дена да не мотивира, да ни ја наметнe замислената тактика но од тоа ништо не профункционира на теренот. Мислам дека е време овојпат одговорноста да ја преземеме ние играчите. Треба да седнеме, да се погледнеме во очи и да разјасниме сите заедно што значи да се игра за националните бои, изјави Пандев за веб страницата на ФФМ.
Македонскиот капитен вината за слабите резултати ја префрли на репрезентативците.
- Селектори за време на играњето на оваа генерација се сменија многу, а ние сме истите. Значи кај нас нешто не е во ред. И јас како капитен сум подготвен да превземам дел од одговорноста. Знам дека притисокот од јавноста ќе биде голем во наредните денови, но ние како професионалци сме навикнати на тоа бидејќи и поразите се дел од фудбалот иако место за оправдување има се помалку. Очекувам сите играчи да ги прифатат добронамерните критики и да преземат одговорност за овој срамен резултат и во иднина чесно да го испотиме дресот кој е привилегија и за кој сонуваат многу фудбалери во Македонија, во спротивно да им го отстапиме местото на помладите и поамбициозните, рече Пандев по пријателскиот натпревар со Луксембург на кој Македонија загуби со 2:1.