Себастијан Фетел го поддржа својот колега Кими Раиконен во обидот да го задржи местото во Ферари. Фетел и Раиконен и претходно беа пријатели, но сега како клупски колеги, Германецот стана „ѕвезда“, додека Финецот е под постојани критики и има подолга листа на возачи кои би го замениле. 35-годишниот светски шампион од 2007 година има направено многу грешки оваа сезона, посебно на последните две трки во Канада и Австрија, но ја има поддршката на Фетел.
„Кими наскоро повторно ќе биде возачот кој сите го знаеме. Поминува низ тешки моменти, но со таков талент невозможно е постојано да си во криза. Тој направи неколку мали грешки, но имаше и многу лоша среќа така што работите се извадија од контекст. Секако дека би сакал да продолжам со него бидејќи имаме одлична соработка, но јас не одлучувам“, вели Фетел.