Светскиот шампион Луис Хамилтон го зголеми водството во генерален пласман со неговата шеста победа оваа сезона на класичното Белгиско ГП во Спа, пред својот колега Нико Розберг, уште еднаш покажувајќи ја моќта на тимот на Мерцедес.
Хамилтон, кој досега имаше само една победа на „патеката на шампионите“ со Мекларен во 2010 година, немаше проблем од пол-позицијата да ја обезбеди својата победа со предност од две секунди.
Болидите на Мерцедес беа доминантни во текот на целиот викенд, декласирајќи ја конкуренцијата откако пред летната пауза на трката во Хунгароринг не беа ниту на подиумот. Покрај тоа, многумина сметаа дека Хамилтон несериозно ја сфаќа својата позиција откако во текот на паузата самиот се фалеше со бурните забави на Барбадос и во Њујорк.
Со 39. триумф во кариерата Хамилтон доби предност од 28 поени пред Розберг на почетокот на вториот дел од сезоната.
-Прекрасно е да се победи пред оваа фантастична публика. За мене ова беше еден неверојатен викенд и само можеме да се заблагодариме на тимот за работата која ја заврши. Ова е остварување на сонот, вели Хамилтон.