Шефот на Рено, Сирил Абитебул, побара од тие кои ги носат правилата да донесат нов сет на регулативи со кои спортот ќе стане поекстремен од 2017. На планот е забрзување на болидите, но преговорите се во застој бидејќи се верува дека нема да има доволно време да се направат гуми за повисоки брзини. Крајниот рок за договор е 1 март.
Стратешката група во Ф1, во која се шест тима - Ферари, Ред Бул, Мерцедес, Вилијамс, Мекларен и Форс Индија, ќе се сретне на крајот на месецот да го одреди финалниот предлог и Абитебул побара од нив да направат големи промени.
„Ние не сме дел од Стратешката група, така што не сме на тие преговори. Од тоа што го знам, се плашам дека ќе имаме конзервативни решенија со кои ќе се избегнат промени бидејќи не сакаат да згрешат. Мислам дека е поопасно да не се направи никаква одлука. Би сакале да видиме амбиција, храброст и промени“, вели Абитебул.
Французинот посочува дека Ф1 мора да биде поинаков спорт и да се одвои од работите како зачувување на гумите и штедење гориво.
„Ние ги сакаме најбрзите болиди и најбрзите возачи. Не ни е грижа за другото. Не треба да се промовира издржливоста“, додава Абитебул.