Од тимот на Ред Бул не се сомневаат дека разликата во перформансите со Мерцедес се намалува, но остануваат сомнежите дали таа предност може да се надмине пред крајот на сезоната. Шампионите стигнаа до двоен подиум во Сингапур минатата недела со Себастијан Фетел и Даниел Рикијардо зад победникот Луис Хамилтон во Мерцедес.
Шефот Кристијан Хорнер вели дека во Сингапур разликата меѓу двата тима била далеку помала од таа во претходнтие трки.
„Разликата со Мерцедес се покажа искривено поради различните резултати на нашите стратегии. Во првиот дел Себастијан можеше да му парира на Луис, и мислам дека тој избега 7 секунди пред влегувањето во боксот. Тие не правеа предност од секунда по круг како претходно, така што бевме поблиску“, вели Хорнер.
Запрашан дали Ред Бул можат да ја намалат разликата пред крајот на сезоната, Британецот не беше сигурен.
„На патеки како таа во Сингапур можеме да бидеме поблиску, но реалноста е дека разликата во коњските сили е голем фактор. Некои патеки кои доаѓаат како Абу Даби, а можеби и Сочи, ќе ја покажат нивната сила. Клучно за нас е да ја завршиме работата во текот на зимата и следната сезона да стартуваме без разлика“, вели Хорнер.
Мерцедес имаат 174 поени предност пред Ред Бул во пласман на конструктори, додека Рикијардо заостанува 60 поени зад Хамилтон во генерален пласман.
„Поради нивната шокантна постојаност, сé уште сме во трката за титулата. Но, ние ќе имаме казна поради моторите со Себастијан, а Мерцедес најверојатно нема да го имаат тоа. Технологијата е доволно зрела да нема проблеми“, додава Хорнер.