Фернандо Алонсо признава дека има измешани чувства за заминувањето од Ферари по петгодишна соработка, но во резултатите на својот екс-колега Фелипе Маса во 2014 гледа пример кој сака да го следи.
Алонсо и неговиот колега Кими Раиконен завршија на 9. и 10. место на последната трка од сезоната во Абу Даби по една од најлошите трки во и така лошата сезона за Скудерија, во која првпат од 1993 година немаат барем една победа.
„Чувствата се измешани. Секако, тимот ќе ми недостасува, момците ќе ми недостасуваат. Во Ферари има фантастични луѓе. Секогаш си фаворит, секогаш си во очите на луѓето како ривал за титулата, и тоа не е лоша работа. Морам да си заминам со одредена гордост, со главата нагоре бидејќи се борев до крајот. Секој возач би требало да се обиде да вози за Ферари барем една година бидејќи се работи за уникатна работа. Но, јас посакувам резултати подобри од 10. место. Мислам дека лани му беше тешко и на Фелипе да се збогува со тимот, но сега беше втор на подиумот, а ние сме 10“, вели Алонсо.
ШЕГА ЗА „МАРЛБОРО ЧОВЕКОТ“ НА ФЕРАРИ
И покрај овие зборови, Алонсо не чекаше многу да се дистанцира од тимот на Ферари и покрај петте сезони во италијанскиот тим.
Шпанскиот возач отворено се смееше на последната смена во Маранело откако шефот Марко Матијачи беше заменет со Маурицио Аривабене, кој досега работеше во тутунскиот гигант Филип Морис.
Алонсо во друштво со својот долгогодишен менаџер и пријател Флавио Бриаторе позираат со отворена кутија Марлборо и со голема насмевка, во очигледен потег кон Аривабене.
Покрај тоа, италијанските медиуми исто така објавуваат дека по крајот на трката во Абу Даби минатата недела, Алонсо симболично веќе не е следбеник на официјалниот Твитер профил на Ферари.