Розберг беше налутен по трката тврдејќи дека неговиот колега Хамилтон му ја „уништил“ трката со туркање во Себастијан Фетел во средината на трката, додека од менаџментот на Мерцедес сметаа дека Британецот не направил ништо погрешно. По состанокот, нов кризен за тимот на Мерцедес, Розберг вели дека го надминал разочарувањето.
„Беше многу интензивно по трката, но седнавме и добро разговаравме и имаше многу констуктивни критики. Сега, тоа е дел од минатото и одиме напред кон Бахреин“, вели Розберг.
Германецот додава дека ќе му покажува повеќе почит на Хамилтон во иднина, кога ќе смета дека таа е заслужена, но исто така дообјасни зошто мислел дека е во право.
„Велите дека плачев? Океј, ќе го имам тоа во умот и ќе се обидам да покажам почит, кога таа е заслужена. Зошто не го нападнав Луис? Го сфаќам прашањето и знам дека е тешко да се сфати однадвор. Но, причината е во тоа што во првиот дел се обидов да го нападнам и тоа не функционираше и само ги уништив гумите и немаше смисла повторно да се обидам со Фетел зад мене бидејќи ќе го ризикував второто место. Единствена шанса за победа беше да се обидам да го претекнам на крајот на трката“, објаснува Розберг.
За Германецот, клучниот момент на трката биле саботните квалификации бидејќи со стартот од второто место не можел да направи повеќе.
„Несомнено најлошиот дел од викендот беше поразот од Луис во квалификациите. Тоа ми ја расипа трката, а разликата беше само 0.04 секунди. Следниот пат ќе морам да бидам побрз за 0.05“, завршува Германецот.
ВОЛФ СЕ ЗАКАНИ СО „ТИМСКИ НАРЕДБИ“
Шефот на тимот, Тото Волф, ги предупреди возачите дека Мерцедес може да почне да носи поцврсти одлуки од боксот доколку се смета дека победата е под закана од Ферари. Триумфот на Себастијан Фетел во Малезија беше „повик за будење“, а обвинувањата на возачите и однесувањето на патеката се неприфатливи.
Волф одби да го обвини Хамилтон, но посочи дека можеле да ја загубат трката ако Фетел излегол пред Розберг, а Хамилтон не ја завршил трката и се закани со „непопуларни“ радиопораки.
„Можеше да дојде до момент кога ќе моравме да бидеме остри преку радиото кажувајќи што е потребно да не се ризикува победата. Луис не направи ништо погрешно, но бевме блиску да му порачаме да забрза. Ако постои ризик Ферари да победи, тогаш ќе имаше непопуларни пораки. Тука не се работи за двајца луѓе на патека туку и за илјада луѓе кои работат на овие болиди. Ако треба да се вмешаме ќе го направиме тоа“, вели Волф.