Светскиот рекет број 2, Енди Мареј, ѝ донесе Дејвис куп титула на Велика Британија по 79 години чекање, откако во првиот неделен меч во Гент со 6:3/7:5/6:3 го совлада Давид Гофан за недостижни 3:1 водство над Белгија.
Британците имаа клучна 2:1 предност по саботните мечеви во двојки, кога Мареј со својот постар брат Џејми го добија мечот во двојки, и беше очекувано Шкотланѓанецот да ја покаже разликата во квалитет против белгискиот рекет број 1, Гофан.
Мареј го комплетира Дејвис купот оваа сезона со совршен 8-0 скор, како само трет тенисер во историјата со таков успех, по Џон Мекинро и Матс Виландер. За британскиот капитен Леон Смит успехот е уште поголем бидејќи само пред три години неговиот Дејвис куп тим беше во „третата лига“ на натпреварувањето.
„Никогаш не мислев дека ќе имаме шанса да направиме вакво нешто и сè уште не ми се верува. Сите беа на највисоко можно ниво, а по мечот во двојки во саботата, мојот брат беше со семејството, додека мене ми требаше сон. Мораме да уживаме во трофејот бидејќи можеби нема да добиеме нова шанса. За мене следен е Австралискиот опен, каде што четирипати загубив во финалето. Морам да научам лекции од ова финале и да го направам тоа и во Мелбурн“, изјави Мареј.
Сепак, Мареј е скромен. Од 12-те поени кои беа потребни да се освои титулата, Мареј освои 11 од нив - осум во сингл и три во двојки со својот брат Џејми. Џејмс Ворд е единствениот тенисер кој не е член на семејството Мареј, кој освои поен.
Велика Британија е единствената нација која се натпреварувала во сите изданија на Дејвис купот од 1900 година, а 10. трофеј ги прави најуспешна нација по САД (32) и Австралија (28). Претходната британска титула дојде во 1936 година со легендарниот Фред Пери како главна ѕвезда, а последен пат тие играа во финалето во 1978 година. Белгија ќе се надева на нова шанса да ја освои својата прва Дејвис куп круна.