Македонската ракометна репрезентација со голот на Манасков во последната секунда извлече реми на дуелот со Србија (27:27) за пласман во следната рунда на ЕП.
Дуелот започна како што се очекуваше, неизвесно, израмнето. Во 13. минута репрезентацијата на србија со головите на Шешум и Никчевиќ и феноменалната одбрана на Станиќ дојде до позитива од два гола 5:7. Со головите на Манасков и првенецот на Мојсоски на ЕП се вративме во игра 7:7. На пет минути до крајот на полувремето нашите ракометари поведоа со плус два 12:10, но не ги искористија шансите да ја сочуваат истата. Промашивме два седмерци. Па следеше казна, најпрво Марсениќ, а потоа Ненадиќ на двапати израмнија на 13:13 по првите 30. минути.
По одморот се продолжи во исто темпо. Постојано го бркавме резултатот. Во 49. минута Македонија со голот на Георгиевски и играч повеќе на теренот поведе со 21:20. Но, Србите веднаш возвратија на 21:21, а потоа на 22:22, а откако не успеавме да погодиме за водство, противникот со голот на Шешун поведе со 22:23 во 53. минута. Сепак во нашиот состав проработе Стоилов, со својот втор гол израмни на 23:23. Марсениќ погоди за 23:24, но Миркуловски реализираше за 24:24. Србија по подолго време не реализираше, но ниту пак ние не успеавме да казниме и тоа двапати по ред. Шешун со својот шестти погодок и носи водство на Србија 24:25, но
Миркуловски се разигра кога беше најмногу потребно за 25:25 на три минути до крајот. Повторно не успеавме да се одбраниме, повторно Шешун (7/7) е лидерот на Србија (25:26). Лазаров погоди, но некој од нашите ракометари направи фаул, па погодокот беше поништен. За среќа протиникот не успеа да ја зголеми предноста, на другата страна Миркуловски изнуди две минути исклучување на помалку од една минута до крајот. Откако Лазаров не успеа да го совлада Станиќ, одбиената топка заврши кај Стоилов кој израмнува на 26:26. Одбраната повторно потфрли, Ѓукиќ погоди за 26:27 на десет секунди до крајот. Манасков во последната секунда погоди за 27:27.
Токму ракометарот на Вардар со десет погодоци беше најефикасен во нашите редови, зад него со пет погодоци беше Гоце Георгиевски.