По двата успешни натпревари во СЕХА лигата, најдобриот македонски ракометен колектив, Вардар, попладнево ќе тргне за Германија. Како што е добро познато „црвено-црниот“ тим в четврток, од 19:30 часот, ќе ја има премиерата во Лигата на шампионите против Рајн Некар Левен, во меч од 11. коло од групата Б. Тимот, предводен од стратегот Раул Гонзалез, вчера го одработи единствениот тренинг во „Јане Сандански“ за оваа средба. Противникот е добро познат бидејќи во последните две години овие два тима се имаат сретнато трипати, и радува фактот дека на сите тие Вардарци се радувале на победата. Но, популарните „лавови“ имаат одлична сезона, пред сè во домашниот шампионат каде што се на првата позиција. Од друга страна, пак, загрижува податокот дека Гонзалез нема да може да смета на тројца играчи. Како што е познато, Игор Карачиќ пред неколку денови имаше операција на хематом на тестисите. Додека Стојанче Стоилов и Дејан Манасков се суспендирани на две недели. Сепак, мала предност македонскиот шампион ќе добие благодарение на тоа што веќе одиграа две квалитетни средби по завршувањето на последното Европско првенство. За Германците, пак, ова ќе биде прва активност во новата година.
Според распоредот, Вардар отпатува ден порано, со цел подобра аклиматизација, како и можност за во Германија да се направат дополнителни тренинг сесии пред почетокот на мечот.