Вардар привремено се искачи на посакуваната трета позиција во групата Б во Лигата на шампиони, откако на гостувањето кај Пик Сегед славеше со 31:29. Одличната игра во второ полувреме и расположениот Страхиња Милиќ на голот, на македонскиот тим му го донесе посакуваниот гостински триумф.
По водството на домаќинот на полувремето 14:13, „црвено-црните“ направија серија од 4-0 за водство од 14:17. Избраниците на Раул Гонзалес во 40. минута поведоа и со 20:16 и го најавија крајот на овој меч. Дека „вардарци“ од Сегед ќе заминат со целиот план потврдија во 48. минута кога имаа највисоки плус шест (26:20). Милиќ, Харбок и Македа беше ударното трио на македонскиот тим. Домаќинот се обиде да направи притисок во финишот, „црвено-црните“ останаа и со играч помалку на минута и пол, но Карачиќ со својот трет гол на средбата го одржуваше водството на Вардар (30:26). На крајот „црвено-црните“ се опуштија па на Сегед му дозволија да се доближи на само два гола 31:29.
Македа со осум погодоци беше најефикасен кај Вардар, зад него беше Душебаев со пет голови од исто толку обиди. Вреди да се спомене враќањето на Игор Карачиќ, кој погоди клучни голови.