Голманот на македонскиот првак Вардар, Арпад Штербик се најде во изборот на топ три најдобри одбрани за минатата сезона во Лигата на шампионите. Шпанецот успешно го спречи ударот на Иван Никчевиќ во последните секунди, на реванш натпреварот од осминафиналната фаза против Висла Плоцк, со што му обезбеди победа на Вардар од 25:24. Штербик очекувано беше награден со громогласен аплауз од трибините на СЦ „Јане Сандански“, а неговата одбрана ја импресионира и цела ракометна Европа. Како негови најголеми „конкуренти“ за освојување на ова признание се појавуваат и Свавомир Шмал од Киелце, како и Георг Иванчук од Веспрем.
Гласањето за најдобра одбрана се спроведува на сајтот на ЕХФ, а според последните резултати, во огромна предност се наоѓа голманот на Веспрем со освоени 70% од гласовите. Штербик, пак, е на втората позиција со 25 проценти.
Без разлика на тоа како ќе заврши резултатот, македонската јавност очекува уште вакви одбрани од Штербик, кои овој пат, се надеваме поткрепени со успешна реализација на вардаровиот напад, ќе бидат доволни за настап на фајнл-фор турнирот од Лигата на шампионите.