Секое гостување во Скопје за стратегот на ППД, Веселин Вујовиќ е посебно. Екипата на Вардар вчера ја забележа третата победа во СЕХА-лигата, откако на домашен терен го совлада ППД Загреб со 32:31.
Предводникот на хрватскиот тим, Веселин Вујовиќ по завршувањето на мечот не криеше дека секое гостување во Скопје за него е посебно. „Кога и да дојдам во Скопје се чувствувам убаво. Со овој град и клуб ме врзуваат убави спомени. Вардар заслужено дојде до победата бидејќи во текот на целиот меч имаа водство и го контролираа резултатот. Ние, пак константно бевме еден до два чекори назад. Тоа што може да се забележи е дека и двете екипи не се во потребната форма од која се очекува од нив. Против Вардар оваа сезона ќе играме уште најмалку три пати и се надевам на подобра претстава од моите играчи" изјави тренерот на ППД Загреб.