Тенисерката Лина Ѓорческа, како втор носител во сингл, беше елиминирана на самиот старт на фјучр турнирот во Каљари, Италија. Нашиот најдобар рекет на натпреварувањето вредно 25 илјади американски долари загуби од Украинката Катарина Заватска со 3:6, 6:4, 6:7.
Очигледно е дека повредата на десната рака која ја има Лина не е целосно заздравена.
Ова беше прва активност за Ѓорческа по еден и пол месец пауза. Но, очигледно е дека ќе биде потребно многу труд за да се врати старата форма, откако ќе се решат проблемите со повредата.
Шендрит Деари, пак, на натпреварувањето во Тунис немаше сили за изненадување против седмиот фаворит, Шпанецот Пол Толедо. Македонскиот претставник, кој на главниот дел настапи со вајлд карта, беше поразен со 1:6, 5:7.
На истиот турнир игра и Томислав Јотовски, кој денеска ќе ги одмери силите со Николаш Сантош од Бразил, кој ја има осмата фаворитска улога.