Еден живот, една љубов! Вардар оди во финалето на Лигата на шампионите, откако во последните секунди од дуелот со Барселона, успеа да го скрши фаворитот и да издвои победа од 26:25.
Триумф и историски пласман за дебитантот на Ф4 донесе Лука Циндриќ со голот во последните секунди во драматичната завршница.
Во поголемиот дел од првото полувреме Барселона беше во водство, а тоа најмногу се должеше поради големиот број технички грешки на македонскиот првак. Кога нашите ракометари заиграа со поголема концентрација успеаја да поведат пред паузата, најпрво со 12:11, а потоа и со 13:12, резултат со кој се отиде на полувреме.
Гол за гол се играше до 44.минута кога за првпат Вардар имаше плус 2 (19:17). Предводени од Кире Лазаров следуваше серија на Барселона од 5:2 за прво водство во второто полувреме (22:21) во 54.минута. Во последните шест минути вистинска драма со среќен крај за Вардар.
Најефикасни во победничкиот состав беа Алекс Душебаев и Иван Чупиќ со по 7 гола, Вуко Боразан постигна 5, Циндриќ 4. Голманот Арпад Штербик беше одличен на голот со 15 одбрани.
