Во првиот од трите натпревари од втората фаза на Европското првенство во кошарка, Македонија вечер од 21 часот игра со Франција. Вечерашниот противник на Македонија на првенството стигна преку дополнителни квалификации, но и покрај тоа во првата фаза ги победи сите три натпревари и како фаворит влегува во мечот.
- Нашата првична цел ја остваривме и сега ни преостанува да изненадиме некој од наредните три противника. Првата шанса ќе ја имаме во дуелот со Франција која според мене е најподготвената репрезентација на физички план и е фаворит во вечерашниот натпревар. Нашата шанса за успех ја гледам во постигнување многу поени, а за тоа треба да проработи шутот како во првото полувреме против Хрватска, изјави селекторот на македонската репрезентација Јовица Арсиќ.
Во Бидгошч ќе се игра групата Е во која e Македонија и таа група е составена со вкрстување на А и Б групите од првиот круг. Репрезентациите си ги пренесуваат бодовите од меѓусебните дуели во групите од првата фаза.
Е група: Грција 4 бода, Франција 4, Германија 3, Хрватска 3, Македонија 2, Русија 2. Денеска играат: Русија - Хрватска (15:45 часот), Германија - Грција (18:15) и Франција - Македонија (21:00).
Ф групата ќе се игра во Лоџ и е составени од репрезентациите што играа во Ц и Д групите во првата фаза.
Табела: Турција 4, Словенија 3, Србија 3, Шпанија 3, Полска 3, Литванија 2.
Натпреварите од првото коло во оваа група се играат утре: Турција - Шпанија (15:45), Полска - Србија (18:15) и Литванија - Словенија.