Менаџментот на тимот на Јамаха му кажа на Валентино Роси дека бил премногу агресивен во одбраната на третото место против тимскиот колега и лидер во генерален пласман Хорхе Лоренцо во финишот на Јапонското ГП во Мотеги. Лоренцо беше побрз од Роси во последните кругови од трката и двојката ги менуваше местата шест пати во последните два кругови, и имаше неколку контакти, пред Роси да заврши на подиумот.
"Мислам дека постапките на Валентино кон Лоренцо не беа коректни. По трката Хорхе дојде кај нас и не праша за нашето мислење за однесувањето на Роси. Тука бевме четири луѓе - јас, Фурусава и уште двајца од Јамаха. Сите се согласивме дека таква битка меѓу тимските колеги навистина нема смисла. Очекуваме нашите возачи да внимаваат повеќе на безбедноста бидејќи тоа беше премногу тесно", вели Лин Џарвис, шефот на Јамаха.
Лоренцо, кој останува во Јамаха и следните две сезони, може да ја освои титулата во Сепанг, Малезија во недела. Седумкратниот светски шампион Роси не е во игра за титулата откако ја скрши ногата на тренингот за Италијанското ГП, а следната сезона ќе настапува за тимот на Дукати.
"Ние му ја кажавме вистината на Валентино - трката беше премногу тесна и тешка. Тоа не се прави посебно поради ситуацијата во шампионатот. Валентино беше преагресивен. Знам дека фановите сакаат спектакуларни битки, но ние пред се сакаме нашите возачи да се почитуваат", завршува Џарвис.