Македонската машка ракометна репрезентација од денеска до сабота во романскиот град Орадеа ќе учествува на традиционалниот турнир „Трофеј Карпати“.
Покрај Македонија и домаќинот Романија на турнирот ќе учествуваат Белорусија и Тунис.
По оставката на Љубомир Савевски, функцијата в.д. селектор на репрезентацијата ќе ја извршува Звонко Шундовски, а ќе му асистира Андон Бошковски.
Македонија вечерва во 18 часот го игра првиот натпревар со домаќинот Романија. Утре за противник ќе го има Тунис (почеток на дуелот е во 16 часот), додека на последниот ден игра со Белорусија (почеток во 10 часот).
На турнирот Шундовски нема да може да смета на Кирил Лазаров, Владимир Темелков и Лазе Мајнов кои имаат обврски кон своите екипи и на соиграчите во репрезентацијата ќе им се приклучат подоцна. Во составот за Орадеа ги нема и Петар Ангелов, Борко Ристовски и Филип Миркуловски (поради повреди), како и Наум Мојсоски и Стевче Алушевски поради замор.
Учеството на овој турнир е воедно и подготовка за двата квалификациони дуели за Европското првенство, кои Македонија ќе ги одигра на 27 октомври во Скопје со Естонија и на 31 октомври со Босна и Херцеговина во Сараево.