Орадеа, 23 октомври 2010 (МИА) - Ракометната репрезентација на Македонија која учествува на меѓународниот турнир „Трофеј Карпати“ во Орадеа, Романија го освои третото место. Избраниците на в.д. селекторот Ѕвонко Шундовски во последниот натпревар на турнирот, претпладнево ја совладаа Белорусија со 31:28.
Белорусите водеа во текот на првите 25 минути со разлика од еден до три голови, за на полувреме да се оди со водство на Македонија од 16:15. Македонските ракометари во вториот дел ја одржуваа предноста и на крајот славеа со три голови разлика.
Во второто коло Тунис вчеравечер ја победи Македонија со 25:16. Македонските ракометари го одиграа најслабото прво полувреме во историјата на репрезентацијата, откако по 30 минути игра противникот водеше со 15:2. Во вториот дел македонските репрезентативци беа поефикасни и ја намалија негативата од 13 на 9 голови на крајот од мечот.
Вториот натпревар од 2.коло заврши со победа на домаќинот Романија над Белорусија со 37:33.
За првото место денеска ќе се борат домашната репрезентација на Романија и Тунис.