Четири града, по два во Данска и во Норвешка ќе бидат домаќини на групите од првата фаза на деветтото Европско првенство за ракометарки што почнува денеска.
Титулата ја брани Норвешка која пред две години во финалето во Скопје ја победи Шпанија. На досегашните европски шампионати Норвешка има освоено 4 титули, Данска трипати била европски шампион, а еднаш на шампионатот победила Унгарија.
Шеснаесетте репрезентации се поделени во четири групи.
Во „А“ групата која се игра во Алборг, Данска во 1.коло играат: Шпанија - Романија (почеток 18:15 часот) и Данска - Србија (20:45).
„Б“ групата се игра во Архус (Данска), а стартните двојки се: Црна Гора - Русија (18:15) и Хрватска - Исланд (20:15).
Натпреварите од „Ц“ групата ќе се играат во Ларвик (Норвешка), а двојките од 1.коло се: Германија - Шведска (17:45) и Украина - Холандија (19:45).
Европскиот шампион и ко-домаќин Норвешка своите натпревари од „Д“ групата ќе ги игра во Лилехамер пред своите навивачи. Во 1.коло од оваа група играат: Унгарија - Словенија (18:15) и Норвешка - Франција (20:15).
Трите првопласирани репрезентации продолжуваат во следната фаза. Финалето е предвидено за 19 декември во Хернинг, Данска.