Само еден и пол месец откако лекарите констатираа дека боледува од рак на црниот дроб, утрово во својот дом во Филаделфија почина поранешниот апсолутен светски првак во бокс, Американецот Џо Фрејзер.
Одличната кариера Фрејзер ја најави на Олимписките игри во Токио во 1964 година, освојувајќи златен медал.
Титулата апсолутен шампион на светот во тешка категорија, во професионален бокс, ја освои седум години подоцна кога во њујоршкиот Медисок Сквер Гарден го нокаутира дотогашниот првак Џими Елис.
Хроничарите од тоа време тврдат дека доминацијата на Фрејзер би траела и подолго доколку не боксувал во исто време кога и „најголемиот меѓу најголемите“ Мохамед Али.
Нивната прва борба, одржана на 8 март 1971 година во Медисон Сквер Гарден, е прогласена за борба на векот. По неверојатна размена на удари во текот на 15 рунди, победи Фрејзер на поени и на Али му го нанесе првиот пораз во кариерата.
Фрејзер во својата кариера имал 37 борби, од кои 32 пати победил, еднаш боксувал нерешено и четири пати претрпел пораз.