Во „Спортскиот центар Борис Трајковски“ во Скопје денеска ќе биде отворено 41-то издание на боксерската манифестација „Златен гонг“. Турнирот кој се одржува во чест на празникот на градот 13 Ноември ќе трае до сабота за кога е предвидено прогласување на победниците и доделување на наградите.
Според програмата првите борби се закажани за 17 часот, а свеченото отворање е во 18 часот, по кое ќе продолжат и борбите од втората сесија.
За утре во 16 часот закажан е почетокот на полуфиналните борби, додека финалните ќе почнат в сабота од 12 часот.
Тринаесет држави ќе имаат свои претставници на годинашниов „гонг“, а меѓу учесниците се и двајца прваци на Африка, Мешеди Ахмет и Јахија Мокраши двајцата од Тунис.
Од македонските боксери поради повреди нема да настапат Примислав Димовски и Мумин Вели, а најдобри резултати се очекуваат од најискусните Жута, Димитар Ташков и Бојан Ристески.