Билетите за првиот натпревар од Топ 16 фазата на Лигата на шампионите, меѓу екипите на Металург и Загреб, кој на 18 март ќе се одигра во скопската арена "Борис Трајковски" во продажба ќе бидат пуштени утре, од пладне. Системот на продажба на билетите нема да се менува, тие ќе одат во продажните места на Тобако.
Се менува во секој случај нивната цена. Синоќа беше закажан последниот состанок на кој требаше да биде дефинирана, а фаворит да победи беше предлогот билетите да имаат 4 цени. Почнувајќи од 100, 200, 300 и 400 денари. За споредба цените на билетите за дуелот со Хамбург беа од 60 до 200 денари.
Цените се зголемени, но од клубот велат дека внимавале на тоа разликата да не биде голема, па така најголемиот дел или повеќе од 70% ќе бидат билети кои ќе чинат 100 и 200 денари, посакапите билети се за М трибините кои спроти и позади записничката маса.
Со оглед на искуството кое го имаа од натпреварот со Хамбург, каде што комплетната сала беше распродадена на 15 дена пред натпреварот, сега се очекува слична "навалица", па препораката од клубот е заинтересираните навреме да си набават билет кој одговара на нивните можности.