Ракометарите на Вардар Про кои се лидери на табелата во СЕХА лигата в четврток во 18 часот, во СРЦ „Кале“ во Скопје го пречекуваат хрватскиот првак и осминафиналист од Лигата на шампионите, тимот на Загреб. Очекуваат полни трибини и поголем број љубители на ракометот на овој натпревар. Како и на сите дуели досега влезот е бесплатен.
Во пресрет на натпреварот со Загреб тренерот на „црвено-црните“ Веселин Вујовиќ очекува ракометен спектакл и победа на неговиот.
- Посакувам Загреб да се појави во најсилен состав, комплетен и да одиграме вистински натпревар. Тоа е екипа која ја победи Барселона (европски шампион), но и ние се надеваме на победа и со тоа да го потврдиме пласманот на завршниот турнир во СЕХА лигата кој ќе се одржи во Загреб, рече Вујовиќ.
Гледачите кои ќе дојдат да го проследат овој натпревар во „СРЦ Кале“ за првпат во живо ќе можат да го видат новото засилување на Вардар Про на голманската позиција Страхиња Милиќ, кој го замени македонскиот репрезентативец Борко Ристовски, кој замина во германски Гумерсбах.
Дебитански настап за „црвено-црните“ на Игор Карачиќ поради повреда се уште е неизвесен.