Ракометарите на Металург ја постигнаа дванаесетата победа во СЕХА лигата откако во салата „Автокоманда“ во Скопје ја совладаа Босна од Сараево со 36:11, полувреме 16:5.
На овој натпревар Металург настапи со изменат состав, а дел од играчите од првиот состав одмараа и ова беше можност да се залечат повредите, а и „резервистите“ ја искористија својата шанса.
Со новите три бодови Металург изби на третото место на табелата со 39 бодови од 16 натпревари.
Првопласиран е Вардар Про со 44 бодови (18 натпревари), втор е Загреб со 41 (16 натпревари), а Татран Прешов е четврти со 37 (17 натпревари). Овие четири екипи најверојатно ќе играат на завршниот турнир што ќе се одржи во Загреб.
Најефикасни кај Металург со по 6 голови беа Гоце Георгиевски и Жарко Марковиќ.
Денес во 16 часот Металург и Босна ќе одиграат уште еден натпревар, во Скопје, а тимот од Сараево ќе ја има улогата на домаќин. Поради смртта на спортскиот директор на Загреб Бартол Калеб, одложен е натпреварот Вардар Про - Загреб што требаше да се одигра во СРЦ „Кале“ во Скопје.