Македонскиот ракометен шампион Металург, попладнево заминува за Загреб каде утре од 20 часот и 15 минути го игра реванш натпреварот од осминафиналето на Лигата на шампионите против хрватскиот првак Кроација Осигурување Загреб.
Тренерот на Металург, Лино Червар кој неколку сезони беше и тренер на хрватската репрезентација и екипа на Загреб во пресрет на реваншот одбраната ја истакнува како клучна за евентуалниот успех.
- Загреб е голем фаворит. Ние ќе мислиме само на нас и ќе се обидеме да им се спротивставиме. Направивме анализа од првиот дуел. Се лежи во одбраната, каде мораме да бидеме трпеливи и ќе се обидеме да ги корегираме грешките, изјави Червар пред тргнувањето за главниот град на Хрватска.
Металург за реванш натпреварот нема да може да смета на повредените од порано Младен Ракчевиќ, Дамир Батиновиќ, Митко Стоилов кои го пропуштија и првиот натпревар, а неизвесно е дали и колку ќе настапат Миладин Козлина и Дејан Манасков. Козлина е во Словенија на рехабилитација бидејќи има повреда и ќе допатува директно во Загреб, додека Манасков поради стомачни проблеми не тренираше изминативе денови.
Пласман во четвртфиналето веќе обезбеди германски Кил, а утре се играат и натпреварите: Копер – Килеце (26:27 прв натпревар), Копенхаген – Савехоф (34:25).
В недела играат: Хамбург – Берлин (30:32), Барселона – Монпеље (28:30), Атлетико Мадрид – Кадетен Шафхаузен (36:27) и Веспрем – Адемар Леон (28:31).