Енди Мареј во четврт-финалната пресметка го совлада Јанко Типсаревиќ со 4-6, 6-3, 6-4 и си обезбеди место во полу-финалето од АТП Мастерс турнирот во Мајами.
Мареј имаше проблеми со болки во стомакот, како и со отпорот кој го пружи Типсаревиќ, но сепак успеа да ги надмине препреките во мечот од 2 часа и 38 минути и да закаже пресметка со Рафел Надал. Шпанецот го елиминираше Џо Вилфирд Цонга со 6-2, 5-7, 6-4 во сетови во другото четврт-финале, а претходно полу-финале обезбедија и Новак Ѓоковиќ и Давид Ферер.
Кај дамите, Марион Бартоли ја прекина серијата од 26 меча без пораз на Викторија Азаренка, и со победа од 6-3, 6-3 во сетови се пласира во полу-финалето од Мастерс турнирот. Серијата на Азаренка беше втората најдобра кај една тенисерка од 1997-та година, кога Мартина Хингис забележа 37 победи по ред.
Агнежка Радванска е втората тенисерка кај дамите која по вчерашниот натпреварувачки ден обезбеди пласман во полу-финалето, откако ја елиминира Венус Вилијамс во четврт-финалниот меч со 6-4, 6-1.