По одигрувањето на синоќешните натпревари во групите остана уште едно празно место за пласман во полуфиналето на Европското првенство што се игра во Србија. Најблиску до оваа позиција е Србија која има бод повеќе од Франција и од Данска и во последното коло во групата доволно и е да одигра нерешено.
Пласман во борбата за медалите обезбедија ракометарките на Норвешка (група 1), Црна Гора и Унгарија (група 2).
Европскиот првак Норвешка ја совлада Шведска за влез во „четворката“, додека во групата 2 Црна Гора и покрај поразот од Германија избори борба за медали, а на Унгарија покрај триумфот над Романија и одговараа и другите резултати.
Резултати Група 1 (Белград): Франција - Чешка 24:22, Норвешка - Шведска 28:25 и Србија - Данска 29:26.
Табела: Норвешка 8 бодови, Србија 5, Франција 4, Данска 4, Шведска 3, Чешка 0.
Резултати Група 2 (Нови Сад): Шпанија - Русија 25:25, Германија - Црна Гора 27:20 и Унгарија - Романија 25:19.
Табела: Црна Гора 6, Унгарија 6, Романија 3, Шпанија 3, Русија 3, Германија 3.
Денеска на Европското првенство е слободен ден, а утре се играат натпреварите од последното коло од главната групна фаза.