Македонската ракометна репрезентација со 34:30 го победи Катар и со голема веројатност ќе се најде во осминафиналната фаза на Светското ракометно првенство кое се одржува во Шпанија.
Ова беше втора победа за Македонија во првите две кола од Мундијалот.
По победата над Чиле изборена со многу мака, во првото полувреме избраниците на селекторот Звонко Шундовски се прикажаа во сосема ново издание. Реализацијата беше извонредна, контрите функционираа беспрекорно, а предуслов за таквата игра беше цврстата одбрана карактеристична за македонските ракометари.
Уште од самиот почеток и водството од 3:0, Кирил Лазаров и неговите соиграчи како да сакаа да докажат дека слабата игра на вчерашната средба со Чиле е заборавена, а 21 постигнат гол во првиот дел е доказ за сериозноста и максималната ангажираност на овој меч. Првите 30 минути завршија со резултат 21:13, а Македонија во одредени моменти имаше и плус 11.
Првите десетина минути од второто полувреме поминаа во игра гол за гол. Во 45. минута Катар се приближи на 26:21 по серијата од 3:0, по што следуваше тајм-аут од Шундовски. Но и тоа не помогна нашите ракометари да се вратат во ритамот од првото полувреме. Катар во 50. минута намали на 28:26 и македонскиот селектор беше принуден да го земе и вториот тајм-аут во период од само пет минути. Следуваа реализации од Стоилов, Кирил Лазаров, а на голот свои минути имаше Борко Ристовски за пет позитива во 26. минута, разлика доволна за конечна победа.
Кирил Лазаров со девет голови беше најефикасен во нашиот состав, а на голот 11 одбрани забележа Борко Ристовски.
Денес македонските ракометари имаат слободен ден, а натпреварите ги продолжуваат во вторник против селекцијата на Исланд.
На првиот денешен дуел од Б групата Исланд го победи Чиле со 38:22.