Морезмо и Мареј ја продолжуваат соработката

Британскиот тенисер Енди Мареј ја продолжува соработката со својот тренер, поранешната француска тенисерка Амелие Морезмо. Мареј почнал да работи со Морезмо по поразот во четвртфиналето од Григор Димитров на Вимблдон.

Мареј остана без тренер по отказот на Иван Лендл во март по двегодишна соработка, а со него шкотскиот тенисер освои олимписко злато, УС Опен во 2012 година и Вимблдон минатата година. Овој пат 27-годишниот тенисер сврти нов лист и одлучи да работи со Морезмо, која е поранешен светски рекет број 1, прво на краток период, меѓутоа се чини дека соработката ќе биде подолга. Јавноста очекува Мареј во наредните денови официјално да објави дека Морезмо ќе остане негов тренер.

Моментално Мареј е во Мајами каде се подготовува за настап на УС Опен, кој почнува во август. Откако покажа слаба игра на Вимблдон тој почна со фитнес тренинзи, а потоа ќе работи на остранување на слабостите во својата игра.