Познатиот композитор и продуцент Дарко Димитров веќе неколку месеци не живее со сопругата Маја. Ова ни го потврди самиот тој. На прашањето дали пејачката Елена Ристеска има врска со неговото заминување од дома, тој категорично рече "не".
- Не се разведов. Само се иселив од дома пред околу 7-8 месеци. Сега и на мене и на Маја ни е поубаво. Супер функционираме и пак заедно се грижиме за нашата ќерка. А со Елена не сме заедно. Не е таа причината за нашата разделба - ни рече Дарко.
Дарко и Маја беа во љубовна врска неколку години. На времето нивната љубов важеше за голема и нераскинлива. Околу седум години се во брак и ја имаат ќерката Клара, која минатиот месец наполни две години.
Дарко и Елена се професионални соработници. И двајцата се дел од продукцијата "М2". Дарко е автор на поголемиот дел од нејзините песни. Тој беше и автор на "Нинанајна", со која таа лани ја претставуваше Македонија на Изборот на песна на Евровизија, кој се одржа во Атина, Грција. Последен пат тие беа заедно на фестивалот "Сунчане скале" во Херцег Нови, каде што настапуваше ексклузивецот на "М2", Ламбе Алабаковски, а тие беа авторскиот тим на неговата песна. Освен тоа, Елена ја доби наградата за најдобар дует со групата "Регина".