Украинскиот претседател Володимир Зеленски и пет лидери на ЕУ разговараа со американскиот претседател Доналд Трамп по неговиот телефонски разговор со рускиот претседател Владимир Путин, надевајќи се дека ќе чујат дека тој се согласил на примирје или дека ако не го стори тоа, САД ќе воведат санкции против Русија, но наместо тоа Трамп ги изненади велејќи дека Путин се согласил на преговори и засега ја исклучил можноста за воведување санкции, соопштија добро информирани извори за „Аксиос“.
Според неименувани извори, Трамп оставил впечаток дека е блиску до повлекување од преговорите, додавајќи дека некои од лидерите на ЕУ кои разговарале со него биле изненадени или дури шокирани од ова.
„Мислам дека нешто ќе се случи. А ако тоа не се случи, јас едноставно се повлекувам, а тие ќе мора да продолжат понатаму. Повторувам, ова е европско прашање и требаше така да остане“, им рече Трамп на новинарите во Овалната соба, неколку часа по телефонските разговори.
Трамп и Зеленски вчера разговараа кратко, а американскиот претседател го праша својот украински колега што треба да му каже на Путин, соопштија извори од „Аксиос“, додавајќи дека украинскиот претседател му рекол да побара итно прекин на огнот, да се закани со нови санкции и да не му нуди отстапки на Путин без да се консултира со Украина.
Кога разговорот со Путин заврши, Трамп повторно го повика Зеленски, а овој пат во разговорот учествуваа и лидерите на Германија, Италија, Франција, Финска и Европската комисија.
Зеленски подоцна изјави дека вториот телефонски разговор со Трамп бил различен од првиот, оценувајќи го како лош, додека неименуван европски извор за „Аксиос“ изјави дека бил конструктивен.
Лидерите на ЕУ изгледаа изненадени што американскиот претседател изгледаше релативно задоволен од она што го слушна од Путин, претставувајќи го тоа како нов развој на настаните, иако рускиот лидер се чинеше дека воопшто не го променил својот став, изјавија извори за „Аксиос“.