Во Каунас се некако веќе работи во тактот на оние балкански "седум-осмини", оној кој го диктираа нашиот национален тим. Јасно и поради што, сензационалните игри кои на овој шампионат ги прикажува четата која ја предводи Марин Докузовски.
Македонската "Фаланга" или шпанската "Фурија", тоа е прашањето на денот, пред она што се нарекува првото полуфинале на овој евро-шампионат во Литванија?
Дали Македонија може да дојде и до нешто повеќе што се граничи со сензација? По домаќинот, и репрезентации како Хрватска, Грција, Финска, БиХ, Грузија, Словенија, да ја победи и супер силната Шпанија?
Марин Докузовски не дава прогнози, нема и зошто... Вели дека и во полуфиналето Македонија ќе игра по стариот и веќе испробан победнички рецепт.
"Немаме намера да го менуваме нашиот стил на играње кој го практикуваме на ова ЕП"- вели Докузовски пред новиот најважен дуел во нашата историја."Свесни сме дека пред нас е еден исклучително силен противник, дека ќе играме против актуелниот европски шампион. Против екипа во која е собрана НБА во мало, со браќата Гасол, Калдерон, Фернандез, Наваро, се светски познати имиња. Но, нема и не смее да има предавање. Кога можевме против една Литванија со 15.000 фанови зад себе, можеме и со другите".
Како да се игра против една таква екипа сјајно "конструирана", и пред се одлично "покриена"? Словенците пробаа со зонска одбрана и имаа успех во тоа прво полувреме.
"Ќе комбинираме нешто во овие 24 часа кои ги добивме и како одмор за играчите и подготовка за нас во стручниот штаб. За мене лично е битно да одиграме како што тоа го правевме досега. Значи да бидеме слободни, да влеземе во дуелот без страв од големината на противникот, и сите тие нивни имиња. Но, досега минавме исто така големи пречки, екипи на нивото на шпанската репрезентација. Бремето на фаворити е на нивна страна. Наше е да истрчаме на теренот и повторно да дадеме се од себе. Знам дека ќе изгинеме, од прв до последен. Нема тука место за ништо друго. Силна одбрана, посигурен напад, добра реализација, тоа може да не донесе до самиот врв на европската кошарка. Не забораваме со кого или против кого играме. Но, веруваме и во себе, тоа право никој не може да ни го одземе, па и фаворизираните Шпанци"- заклучува Докузовски.