Селекторот на кошаркарската репрезентација на Македонија, Марин Докузовски имаше само пофални зборови за своите избраници кои во полифиналето на Европското првенство во Литванија загубија од Шпанија со 92:80.
“Имаме големо срце и тоа не доведе до тука. Сакавме да одиграме добро, иако знаевме колку голем тим е Шпанија и колку е тешко да бидат изненадени. Не одигравме баш сјајно во одбраната како на претходните натпревари, но тоа е поради фактот дека бевме заморни и што противникот беше сјаен во офанзивниот скок. Сепак, игравме добро и верувам дека не ги разочаравме нашите навивачи” - изјави Докузовски.
Македонскиот центар Предраг Самарџиски истакна дека националната селекција нема да се откаже од медал на овој Евробаскет.
“Честитки за Шпанија за триумфот. Се боревме и на крајот не успеавме, но се надевам дека нашите навивачи ги направивме горди. Бевме близу, а кога нема да дадете кош во неколкуте последни минути, тогаш тешко можете да победите. Сега се насочуваме кон мечот за третото место и ќе пробаме да стигнеме до бронзата во наш стил. Кој и да биде нашиот противник, нема да го менуваме тој пристап.” - изјави Самарџиски кој против Шпанија постигна 12 поени.