И покрај испаѓањето од Премиер лигата, шпанскиот стручњак Рафаел Бенитез потпиша нов тригодишен договор со Њукасл, објави клубот.
Бенитез во март го презема Њукасл и имаше солидни резултати но не успеа да го спаси клубот од преселба во понизок ранг на натпреварување. Сепак, навивачите на „црно-белите“ му дадоа голема поддршка на Шпанецот и побараа тој да остане на менаџерската позиција.
- Задоволен сум што останувам во Њукасл. Големо влијание на оваа одлука имаше и љубовта на навивачите која ја почувствував, а исто така и односот на управата кон мене беше повеќе од коректен. Ова е голем клуб и јас сакам да сум дел од неговата иднина, изјави Бенитез, по потпишувањето на договорот.
Шпанскиот фудбалски стручњак во својата тренерска кариера претходно работеше во Реал Мадрид, Наполи, Челзи, Интер, Ливерпул, Валенсија, и уште неколку шпански екипи од понизок ранг.