Репрезентацијата на Англија точно 50 години чека да се израдува на триумф на едно големо натпреварување. Колевката на фудбалот, прв и единствен пат досега се радуваше на трофеј на Светското првенство во 1966 година, кога беше домаќин. Оттогаш поминаа пет децении, а „Гордиот Албион“ нема злато ниту на европско ниту на планетарно ниво.
По разочарувачкиот настап на континенталниот собир во Франција, Англија реши да го смени селекторот. На местото на Рој Хоџсон беше поставен Сем Алардајс.
СПЕЦИЈАЛИСТ ДА ГИ СПАСУВА ЕКИПИТЕ
Популарниот Биг Сем со години мечтаеше да застане на чело на националниот тим, а сега како 61-годишник тоа му се исполни.
„Ова ќе ми биде најголемиот предизвик во долгогодишната кариера и се надевам дека ќе бидам успешен како што бев досега. Имам тренирано многу докажани играчи како што се Фернандо Јеро, Јури Џоркаеф, Џеј Џеј Окоча, Гери Спид, Николас Анелка и Мајкл Овен. Знам како треба со докажани ѕвезди и возбуден сум што ќе работам во репрезентацијата“, рече Алардајс, кој во 2006 година беше одбиен, кога конкурираше за оваа функција.
Во кариерата, тој е познат како специјалист за екипите кои се борат за опстанок. „Кога се работи за освојување трофеи во Англија, никогаш не сум бил на врвот од Премиер лигата. Секогаш сум се борел да ги спасам екипите од испаѓање и секогаш сум успевал во тоа. Знам дека не е исто како кога ќе освоиш трофеј, но, сепак, е голем успех кога ќе спасиш некој тим да не испадне“, додаде новиот селектор на Англија.
ЌЕ ИГРААТ САМО НАЈПОДГОТВЕНИТЕ
Селекторот вели дека кај него нема да играат имињата и нема да има играчи кои ќе бидат подобро третирани од другите. Затоа Алардајс вели дека може да се случи и некоја голема ѕвезда да не биде во составот, ако не е во посакуваната форма.
„Мора да создадеме тимски дух во репрезентацијата. Играчите да се зближат и да делуваат како една целина. Уште немам одлучено кој ќе биде капитен на составот. До мечот во септември има време. Тогаш ќе одлучам дали Руни или некој друг ќе ја има честа да биде предводник на теренот“, рече Алардајс.