Македонската фудбалска репрезентација се подготвува за првиот натпревар од новиот квалификациски циклус за пласман на СП во Русија 2018 година, против Албанија на 5 септември во Скадар. Фудбалерот на Палермо Илија Несторовски верува во квалитетот на оваа репрезентација и се надева дека подготовките ќе минат без проблеми.
- Верувам дека секој играч кој е овде може да ги исполни замислите и очекувањата на селекторот. Вербата во нашите квалитети е она што не мотивира и навистина се надевам дека на најдобар начин ќе ги одработиме подготовките и ќе бидеме подготвени за пресметката во Скадар. Тимскиот дух е секогаш важен и се надевам дека ќе биде наша предност на натпреварите. Јасно е дека ќе биде тежок натпреварот против Албанија, но треба да бидеме концентрирани на нашиот пристап и игра, изјави Несторовски.
И членот на Шкендија, Бесарт Ибраими вели дека сите во тимот размислуваат позитивно, се надева дека атмосферата ќе остане на високо ниво.
- Нов почеток, нови квалификации, нов предизвик. Мораме да ги почитуваме замислите на селекторот за да постигнеме позитивен резултат. Наша цел е да бележиме подобри игри и резултати во квалификациите и се надевам дека ќе успееме во тоа. Позитивни сме, атмосферата е одлична и се надевам дека ќе бидеме на високо ниво како на тренинзите, така и на натпреварот, изјави Ибраими.