Подготовките за еден од најголемите дерби дуели во светот, шпанското „Ел Класико“ веќе започнаа. Барселона и Реал Мадрид ќе излезат на мегдан в сабота на „Ноу Камп“. Како ретко кога во последниве неколку години, Реал Мадрид влегува со предност од дури шест бода. Гостите се полни со самодоверба и се надеваат дека ќе ја задржат оваа предност, а во Барселона се под притисок дека мора да ги освојат трите бода.
Двете екипи се соочуваат со проблеми и сигурно нема да настапат во најсилните состави. Дури 11 играчи во двата тима се повредени. Дел од нив сигурно ќе го пропуштат мечот, а дел се во трка со времето за да бидат подготвени за дербито.
Реал Мадрид сигурно ќе биде без Герет Бејл, Тони Крос и Алваро Мората, додека неизвесни се дефанзивците Фабио Коентрао и Рафаел Варан. И тренерот на Барселона, Луис Енрике има многу проблеми со повредени. Дури шестмина играчи се под знак прашалник за „Ел Класико“. Листата на повредени ја предводи капитенот Андрес Иниеста, Жори Алба, Жерар Пике, Жереми Матије, Самуел Умтити и Арда Туран.