Напаѓачот на Манчестер сити Серхио Агуеро повторно беше ставен на клупата на мечот против Свонси, а на негово место играше новото засилување Габриел Жесус кој ги даде двата гола во победата со 2:1. Агуеро влезе во игра во 83 минута, точно пред изедначувачкиот гол на Свонси. Аргентинецот беше на клупата и на мечот со Вест Хем на 1 февруари, а воопшто не беше во комбинација на мечот со Кристал Палас во ФА Купот.
„Имам уште три месеци да му помогнам на клубот, а потоа тие ќе решат дали ќе има место за мене или не. Јас сакам да останам, но тоа не зависи само од мене. Имам договор на уште три години и затоа велам дека сум среќен тука. Кога седиш на клупата, треба да го прифатиш тоа и да ја чекаш својата шанса. Во следните три месеци ќе се обидам да го убедам Пеп дека треба да ме задржи“, вели Агуеро кој сезонава постигна 11 гола.
Само што дојде Гвардиола на Итихад го седна Агуеро на клупата и ги пропушти првите неколку натпревари. Потоа почна да добива шанса. Со тоа Пеп како да сакаше да му порача дека Сити не зависи само од него и дека мора да се труди за да го сочува првотимскиот статус.