Интер ја продолжува потерата по тренерот на Тотенхем, Маурисио Покетино, и во обид да го намами на „Џузепе Меаца“, му нуди двојно повисока плата од онаа што ја добива во лондонскиот клуб.
„Нероаѕурите“ во вторникот го отпуштија Стефано Пиоли, на три кола пред крајот на Серија А, затоа што тимот освои само два бода во последните десет кола. Јасно е дека местата за Европа се далеку, па раководството се подготвува за новата сезона, во која целта ќе биде пласман во топ 3.
Работата со Диего Симеоне пропадна затоа што тој изјави дека нема да си оди од Атлетико, Луис Енрике ќе одмора една година, па изборот паднал на Покетино, во кого сите на „Меаца“ гледаат како на спасител.
Како главен адут на Интер во преговорите со Покетино е платата. „Нероаѕурите“ му нудат на аргентинскиот стратег двојно повисока плата (околу 8,5 милиони фунти) од онаа што ја добива на „Вајт Харт Лејн“. Освен тоа, тренерот би добил голем буџет за трансфери и ќе може да доведе неколкумина квалитетни играчи. А и Тотенхем, во страв да не го загуби, е решен да му понуди поголема плата за да го задржи во своите редови на подолго. Ќе видиме кој ќе излезе како победник. Доколку пропадне и оваа варијанта, тогаш Интер, веројатно, ќе се насочи кон Лучано Спалети, кој по завршувањето на сезоната ќе си замине од Рома.