Баерн Минхен победнички ја започна и новата сезона во Бундеслигата, но радоста кај баварците не е толку голема. Шампионот, на свој терен со 3:1 го победи Баер Леверкузен, во дербито на стартот. Сепак статистиката покажува дека нешто можно е да не функционира во тимот од „Алијанц Арена“.
Фаворитот имал посед на топка од само 51,3 отсто што е најмал процент откако на клупата е седнат италијанскиот стратег Карло Анчелоти. Досега најслаб посед на топка во домашното првенство под водство на Анчелоти било 54 проценти за Баерн Минхен.
Интересно е тоа што поседот на топката во второто полувреме бил во корист на гостите, затоа што Баерн во своја контрола, ја имале топката вкупно 49,5 отсто од времето. Дури и поранешниот капитен на најтрофејниот тим, легендарниот голман Оливер Кан, изрази загриженост.
„Беше очигледно дека Баерн не беше на посакуваното ниво во одредени моменти. Му беше дозволено на Баер да направи многу шанси. Во второто полувреме Леверкузен упати осум удари, наспроти само два на Баерн Минхен“, вели Кан.
И покрај неубедливата игра, Баерн Минхен по само 20 минути имаше предност од 2:0, а Левандовски погоди од пенал во 53 минута за убедливи 3:0. Баер Леверкузен даде почесен гол преку Мехмеди.