Вчера, на специјална прес-конференција ФИФА ги објави тројцата фудбалери кои ќе се борат за "Златна топка" за 2010 година. Сите тројца се играчи на Барселона, Андрес Иниеста, Лионел Меси и Чави. Вистинско изненадување е отсуството на Весли Снајдер, кој беше најзаслужен за трите титули на Интер (Лигата на шампионите, Серија "А" и Купот на Италија), а ја предводеше Холандија до финалето на Светското првенство во Јужна Африка постигнувајќи пет погодоци. Значи се остварија тврдењата на италијанските медиуми дека Холанѓанецот нема да ја добие наградата, што е шок со оглед на тоа дека беше фаворит за неа.
Ова е третпат во историјата тројцата кандидати за наградата да доаѓаат од ист клуб, нешто што претходно се случи со Милан во 1988 и 1989 година.
|
|
|
Кој до наградата? - Чави, Меси и Иниеста | |
Актуелниот освојувач на титулата, Меси, повторно е фаворит, а благодарение на светската титула со Шпанија Иниеста и Чави влегоа во потесниот круг. Чави минатата сезона беше трет, а Иниеста првпат е меѓу фаворитите. Доколку еден од нив победи, ќе стане вториот Шпанец кој ја освоил Златната топка по Луис Суарез во 1960 година. Инаку, фудбалерите на Барселона досега освоиле шест Златни топки.
Победникот ќе биде прогласен на 10 јануари 2011 година во Цирих, каде ќе гласаат 154 новинари и 208 тренери и капитени на тимовите во ФИФА.