Англискиот селектор Рој Хоџсон изјави дека е разочаран од одлуката на Џон Тери да се збогува со националниот дрес.
- Сакам да му се заблагодарам на Тери за сето она што тој го направи за тимот од кога дојдов на чело на репрезентацијата, се разбира дека сум разочаран, бидејќи загубивме квалитетен и искусен играч.
Тери во неделата ја шокираше јавноста со изјавата дека ја завршува репрезентативната кариера, лут на фудбалската асоцијација (ФА) која се’уште води дисциплинска постапка против него, иако судот во Лондон го ослободи од обвинувањата дека минатата година го навредил играчот на Квинс Парк Ренџерс, Антон Фердинанд на расна основа.
Тери го имаше своето деби за Англија во 2003 година на пријателски натпревар против Србија и Црна Гора, а во репрезентативниот дрес настапи на 78 натпревари и постигна шест гола.
Ако биде прогласен за виновен од Комисијата на ФА, 31-годишниот играч на Челзи би можел да добие осум или повеќе натпревари суспензија.