Постои веројатност уругвајскиот напаѓач Луис Суарез да го напушти Ливерпул на крајот на сезоната и да се пресели во Реал Мадрид и со тоа да го оствари својот сон од детството. Шпанските медиуми шпекулираат дека Реал Мадрид за фантастичниот напаѓач е подготвен да плати 110 милиони евра. Доколку овие најави се реализираат, тоа би го урнало сегашниот рекорд за трансфер на Герет Бејл од Тотенхем во мадридскиот тим за 100 милиони евра.
Според информациите пред три недели претседателот на Реал, Флорентино Перез, му понудил на Ливерпул 85 милиони евра за напаѓачот, што е одбиено, но сега понудата е повисока за 25 милиони евра. Освен тоа се наведува дека Перез ќе се обиде да го убеди Суарез да прејде на „Сантијаго Бернабе“ со неделна плата од 327,000 евра, за разлика од 242,000 евра што моментално ги добива во Ливерпул.
За ангажман на уругвајскиот репрезентативец мадриѓаните мораат да продадат дел од своите играчи. Па така на лето на трансфер листата би требало да се најдат Мората, Коентрао и Варан, а би била отворена можност да понуди за Икер Касиљас, Иско, Ди Марија и Кедира.
Англискиот клуб не би можел да остане имун на некоја непристојна понуда, а со тие пари можат да се направат многу работи за клубот, но од друга страна достојна замена за Суарез би било невозможно да се пронајде. Останува да почекаме да заврши Мундијалот во Бразил па да видиме како ќе дејствува Реал во преговорите со луѓето од Енфилд.