Италијанските медиуми блиски до тимот на Наполи и неговите раководни луѓе често знаат да исфрлат информација која е поврзана со играчите на овој клуб и нивната евентуална иднина таму. Па така, една од нив вели дека во следниот преоден рок Рафаел Бенитез, стратегот на Наполи, ќе биде фокусиран на доведувањето во своите редови на Ерик Ламела, еден од најталентираните млади играчи во светот кој по одличните игри во дресот на Рома направи голем трансфер во премиерлигашот Тотенхем. Сепак, Аргентинецот не се снајде најдобро на островото, речиси и не добива минутажа, па неговата желба да се врати во Италија е несомнена.
Тука би требало да стапи на сцена Наполи, кој има прекумерно голем број напаѓачи, и може да се откаже од дел од нив. Па така, во евентуалниот трансфер на Ламела, со оглед на неговата поприлично голема вредност ќе треба некој да замине во Лондон во обратен правец. Во прв ред секако дека е нашиот Горан Пандев, кој и така не е задоволен од статусот кој го има во Наполи, а веројатно и му треба нов предизвик наречен Премиер-лига на нашиот најдобар фудбалер. Освен тоа, Пандев и Тотенхем во минатото веќе беа поврзувани, а сега ете има и реални шанси тоа и да се оствари.