Најголемата ѕвезда во тимот на Реал Мадрид, Кристијано Роналдо може да не игра во Суперкупот на Европа, кој се игра следниот месец. „Кралскиот клуб“ како победник во Лигата на шампионите ќе се обиде да стигне до нов трофеј во дуелот со освојувачот на Лигата на Европа, Севиља. Дуелот е закажан за 12 август, а се игра во Кардиф.
Роналдо во последниве неколку недели има постојани болки на коленото и му беше препорачано да мирува. Шпанското првенство почнува на крајот од август, што би било доволно време Португалецот да го одмори коленото.
Од елиминацијата на Португалија во групната фаза на Светското првенство, Роналдо е на одмор и не тренира. Дури на крајот од оваа недела ќе започне со лесни тренинзи и до крајот на август веќе би требало да биде целосно подготвен за настапите во Примера дивисион.