Еден од најдобрите тренери на денешницата, Жозе Мурињо, многу лошо ја почна 2015 година. Португалскиот стратег со Челзи загуби 3:5 во лондонското дерби против Тотенхем. За Мурињо ова е само вторпат во тренерската кариера неговиот тим да прими пет гола на еден натпревар. Претходно тоа му се случи како предводник на Реал Мадрид во дуел со вечниот ривал Барселона. Сега и Тотенхем застана рамо до рамо со каталонскиот гигант.
„Направивме многу поединечни грешки во одбраната. Нашите дефанзивци не можеа да се справат со брзиот Чадли и вештиот Кејн. Може да се зборува за клучните моменти на дуелот, но можам да кажам дека петтиот гол што го примивме едноставно нè деморализираше“, рече Мурињо.